Neste 2023 regresa o certame escolar dirixido á rapazada da comarca de Bergantiños. E, con esta, van 22 edicións de teatro radiofónico!
O Xestal
A 32 edición do FIOT acolle un proxecto de especial significado para o festival, a coprodución coa compañía Contraproducións e estrea dunha obra de teatro sobre Carlos Díaz O Xestal. Esta iniciativa propia estará acompañada doutras interesantes propostas artísticas ou divulgativas que nos achegan a este persoeiro.
Leer más
Carballés de adopción, falecido hai 30 anos, é unha figura relevante na cultura popular galega. Na súa vida tivo un enorme éxito como contador de contos e hoxe está inxustamente esquecido. Comprometido co mundo rural e a cultura tradicional galega, como un xograr, soubo arraigar as súas historias na vella tradición do escarnio popular e creou un estilo propio.
Xa hai que o festival comezou a pensar e a traballar para reivindicar e poñer en valor a súa contribución ás artes escénicas actuais como pioneiro da narración oral galega, un xénero que o Outono de Teatro considera un sinal de identidade, e a creación dun texto dramático e produción dun espectáculo son recursos importantes para que o seu legado perdure e se estenda.
O pleno do Concello de Carballo declarou 2023 Ano do Xestal para recoñecer a figura do coñecido humorista e narrador, músico, gran folclorista, activista social e fondamente comprometido coa defensa e difusión da cultura tradicional galega. Esta creación teatral, na que o Concello tamén se implicou directamente, é o mellor “albaroque” para un ano no que o candil do Xestal volveu prender. Que a súa luz permaneza acesa!
Zoom FIOT 2023
Proxecto fotográfico sobre o FIOT que se realiza desde hai 8 anos, no que distintos fotógrafos realizan unha sesión fotográfica cunha compañía, para captar a actividade que permanece oculta ao público (montaxe, ensaios, maquillaxe, vestiario…). Con este traballo realizarase unha exposición que formará parte do programa da seguinte edición.