O Zoom FIOT é un proxecto fotográfico que, desde hai nove anos, vén ofrecendo unha visión íntima e persoal do Festival Internacional Outono de Teatro. Cada ano, un grupo de fotógrafos teñen a oportunidade de seguir un espectáculo durante un día, capturando eses momentos previos á maxia que ocorre sobre o escenario: a montaxe, os ensaios, a maquillaxe, o vestiario e outras actividades entre bastidores. Deste traballo resultan dúas obras seleccionadas por cada fotógrafo, que formarán parte dunha exposición na seguinte edición do festival. Grazas a esta iniciativa, o público pode ver máis alá do visible, achegando a arte fotográfica ao mundo do teatro dunha maneira fascinante e reveladora.
Exposición ZOOM FIOT 2023
Unha ollada privilexiada ao corazón do FIOT, que recolle unha selección de imaxes únicas que capturan a esencia e a vida oculta do festival. Oito fotógrafos foron os encargados de inmortalizar momentos únicos, desde os preparativos ata os ensaios, pasando por esas escenas que o público non adoita ver e que ofrecen unha perspectiva nova e emocionante.
Os artistas participantes desta edición son José Luis Castro, José Manuel Varela, Fernando Nieto, Kiko Rojo, Criss Becerra, Andrea Sánchez, Luz Vilas e Marcos Rodríguez.
Novos Talentos
Se a fotografía é a túa paixón e queres vivir o FIOT desde un ángulo diferente, non deixes pasar esta oportunidade! O ZoomFIOT convídate a ser parte dun proxecto único onde poderás captar a esencia oculta dun dos festivais de teatro máis importantes de Galicia. Chama ao 981 704 300 e participa na seguinte edición.
