Xograresa de Outono

O Xograr de Outono é un nomeamento honorífico co que o Festival Internacional Outono de Teatro recoñece a unha persoa ou entidade que destaca pola súa traxectoria na promoción e desenvolvemento do teatro en Galicia. A elección da galardoada correspóndelle aos anteriores Xograres de Outono e á Asociación Cultural Telón e Aparte.

A nova xograresa que ingresa na comunidade de xograres do FIOT é unha das representantes da dinámica nova xeración das artes escénicas galegas que están abrindo renovados camiños que os xograres e xograresas queren recoñecer, Areta Bolado.

Areta Bolado é unha creadora moi versátil; actriz, dramaturga e directora cunha linguaxe contemporánea, irreverente e estimulante e cun pulso creativo que ten como valores fundamentais o feminismo e a inclusión, e, en especial, os dereitos do colectivo LGBTIQ+.

Cunha bagaxe recoñecida dentro e fora de Galicia, Areta é unha das fundadoras da compañía A Panadaría, coa que artellou un teatro hilarante, transgresor e profundamente político. O seu carácter irreverente e lúdico como intérprete enchoupa outros proxectos teatrais e audiovisuais persoais xunto a creadores como Marta Pazo, o CDG, Miguel Canalejo. Mantén tamén unha vía de exploración entre a música e o teatro xunto a Ailén Kendelman, da que xurde o conxunto Áureas. Na súa traxectoria recibe moitos premios de ámbito autonómico ou estatais tanto como actriz, dramaturga ou directora.

Neste 2025, como un mostra máis da aposta do FIOT pola raíz, pola converxencia entre diferentes artes e o compromiso co talento emerxente e local e manifestacións propias como a olería, a Asociación Cultural Telón e Aparte encargoulle o deseño do novo premio da Xograresa de Outono e do Premio do Público á artesá carballesa María Barca, formada en Belas Artes e impulsora do espazo Crúa en Carballo.

María Barca é unha creadora comprometida coa produción artesá e a cerámica, entre outras disciplinas artísticas como a fotografía, que busca a posta en valor da nosa raíz, o traballo manual e a tradición baixo un prisma contemporáneo.