Doce metros cuadrados de piel

A pel humana está feita de poros e engurras; de recordos, praceres e cicatrices. No escenario, seis persoas —tres novas e tres maiores— enchen doce metros cadrados de pel para explorar os misterios do corpo. Comparten sen complexos as súas historias, o seu humor e a súa sexualidade. Que é o desexo? Como cambia o pracer e a identidade co paso das décadas?

Unha proposta poética, de autoficción e documental sobre as luces e sombras de como amamos e habitamos os nosos propios corpos. Invita a escoitar, compartir e descubrir que, por riba das diferenzas, hai preguntas, medos e desexos que atravesan todas as idades.

O espectáculo é froito do proxecto de mediación e creación interxeracional sobre sexualidade Morderse la lengua dirixido a persoas de diferentes idades e ao que se incorporará un grupo de persoas mozas e maiores de Carballo, a través dun obradoiro coa compañía nos días previos á función, convertendo esta representación nunha experiencia viva e irrepetible.

La Rueda Teatro Social entende o teatro como unha ferramenta de transformación social e de participación cidadá. A compañía leva máis de quince anos desenvolvendo proxectos que combinan creación escénica e intervención comunitaria.