Coro Teatral LoitaMADRE

Queres participar nunha experiencia teatral profesional e colaborar cunha compañía de referencia na creación do seu espectáculo?

LoitaMADRE é o novo proxecto de ButacaZero. Partindo da loita das nais contra a droga en Galicia, con movementos como Érguete, a compañía analiza as grandes loitas históricas de nais e pon en valor as heroínas cotiás que logran o cambio desde abaixo.

Tras un longo proceso de investigación e escritura no que aínda están inmersos  recoñecido cunha prestixiosa Bolsa Leonardo da Fundación BBVA- e partindo de textos da obra escrita por Esther F. Carrodeguas, a formación proponlle a un grupo de nais carballesas explorar xuntas como configurar a montaxe para que as nais de cada localidade, de cada teatro, se incorporen a cada representación a modo de coro teatral, construíndo unha voz colectiva sobre o escenario.

Queremos que esta ambiciosa proposta forme parte da programación do FIOT 2027 e que o público do FIOT poida ir coñecéndoa desde dentro, así como contribuír ao proceso de construción do espectáculo.

ButacaZero é a plataforma creativa da dramaturga e actriz Esther F. Carrodeguas e do director Xavier Castiñeira, que propón o diálogo coa actualidade desde unha mirada crítica e irónica.