O ano pasado reconvertemos a nosa Escola do Espectador, xa de longa andaina, nunha proposta máis diversificada que, ademais de aportar claves que faciliten a comprensión e a análise dos espectáculos, sexa tamén pretexto para profundar noutros temas de interese artístico ou social.
Cada sesión está conducida por diferentes xornalistas especializados en artes escénicas que varían semanalmente, que entrevistan aos equipos artísticos dos espectáculos.
Unha característica esencial desde formato é a súa vocación dixital. Unindo aos nosos intereses na formación dos públicos e no uso dos novos medios dixitais e nos novos hábitos sociais, creamos unha proposta diferente que converte en podcast cada sesión.
A iniciativa permite xerar contidos específicos e de análise sobre a programación desta 32ª edición, crear un novo espazo de convivencia entre público e artistas, así como novas vías de difusión do coñecemento vinculados á “Escola do Espectador”. Estes podcast son conversas máis alá das dramaturxias, guiadas por expertos do sector que permiten xerar, desde a proximidade, un arquivo documental, que darán conta do espírito reflexivo, crítico e contemporáneo do FIOT.
Neste 2023, a Escola do Espectador nas Ondas contará con catro episodios, cada un cunha temática específica das liñas xerais do festival, e será gravado ao vivo. Os podcast estarán dispoñibles, baixo o paraugas Onda FIOT, na web oficial do festival así como noutras plataformas dixitais.
As convidadas e convidados serán un luxo que deberas desfrutar. 100% selo FIOT. Esperámoste cun café ou vermú!
Información práctica
As sesións de Onda FIOT, abertas ao público, con acceso libre ata completar a capacidade da sala, terán lugar todos os sábados de outubro, en horario de mañá, no Dubra Café, que invitará ao público asistente a un ‘café FIOT’, un vermú ou outra consumición mentres goza coa charla entre artistas e xornalistas.
As entrevistas cos artistas e compañías presentes no FIOT -Paco Becerra, Xavier Bobés, Cándido Pazó e outras voces do programa- correrán a cargo de recoñecidos xornalistas culturais galegos.
A información detallada do programa de Onda FIOT farase público proximamente a través da páxina web www.fiot.gal e das redes sociais do festival.
