É meu amigo!

Cando coñeceu a Martiño, Gema soubo que a súa vida xa nunca sería igual. El é moi introvertido, pero aínda que lle abonde un recuncho de parque para xogar, no seu maxín collen mil mundos, mil aventuras e algún que outro medo… Só quen teña o don da curiosidade e a ferramenta da empatía poderá mergullarse con Martiño nunha aventura que remate no máis alto do Everest.

A amizade, a fraxilidade, e a comunicación son os temas deste segundo espectáculo inclusivo de A Trastenda dos Contos para persoas xordas e ouvintes, que conta por igual en lingua de signos e lingua oral. Nesta ocasión, a aposta da compañía para sensibilizar na inclusión e na igualdade de oportunidades conta co apoio do FIOT,  preocupado tamén por manter un comportamento socialmente responsable e pola atención ás necesidade de todo o público.

Intérpretes e dramaturxia: Gema Santos e Caxoto
Deseño iluminación/son: Daniel García
Asesoramento en lingua de signos: Gema Santos
Escenografía: Banale
Adaptación artística: Marta Iglesias