Asoballada por fentos

Entre concerto e conferencia performativa, este estudo simbiótico entre arquivo e performance conta co acompañamento musical de Gabi Reboredo e convídanos a ler con outros ollos os materiais da nosa memoria folclórica, os arquetipos e a instrumentalización da identidade das músicas, as danzas e o folclore levadas a cabo durante o réxime franquista e a súa proxección sobre os modos contemporáneos de reproducir culturas enxebres.

Esta é a primeira mostra do traballo en proceso do proxecto do artista e investigador Álvaro Corral, froito da residencia de creación realizada no Pazo da Cultura durante o verán, coa colaboración da Concellaría de Cultura a través do Programa de Residencias Paraíso 2026 promovido polo Colectivo RPM.

Os estudos e prácticas artísticas de Álvaro Corral propoñen novos puntos de vista desde os que repensar os marcos de pensamento oficiais e como as prácticas tradicionais galegas, en particular, se poden reactivar como ferramentas críticas, poéticas e disidentes. Os seus traballos formaron parte de importantes centros de arte.