Mala vida e pior morte de Ricardo III

Quen foi Ricardo III de Inglaterra? Un conspirador? Un monstro? Un asasino sen escrúpulos? Neste divertimento cun punto de vista histórico, de lirismo patético pero no que prima o humorístico, o defunto Ricardo III rebatera a historia negra que cae sobre el debido a un tal William Shakespeare, explorando esta manipulación histórica e cultural.

Entre táboas e serraduras, nun recuncho do serradoiro do Tarambollo, o actor Evaristo Calvo carga coa coroa e abraiaranos cunha interpretación audaz e cómica na que dá vida a múltiples personaxes e reivindica a humanidade do monarca fronte ao cruel retrato coñecido. Acompañaranos ás raíces máis dignas e máis ridículas do corazón humano.

Este clásico deconstruído e desfiañado é o proxecto máis persoal de Evaristo e no que leva inmerso varios anos e para o que se acompañou dun diverso equipo e contou coa coprodución do Centro Dramático Galego.