Torta Torta

O festival abre as súas portas coa tradicional cita para presentar a súa programación, un primeiro encontro cos espectadores, cos socios e socias de Telón e Aparte, co voluntariado e coas institucións e entidades colaboradoras que fan posible a 35ª edición do FIOT.

Un momento feliz de reencontros co público, a nosa forza e a nosa inspiración; de compartir e defender un programa que realizamos con ilusión; de agradecer ás institucións e colaboradores, socios e voluntariado o seu compromiso con este proxecto, co Corazón de Teatro de Galicia.

E recibirémolos con alegría e música para celebrar este inicio.

Nestes tempos onde impera a “multitarefa” e a intelixencia artificial ameaza con gobernalo todo, poucas cousas hai tan contemporáneas e nostálxicas como un encontro con esta muller orquestra.

Unha señora orquestra é o proxecto que presenta a música e actriz Ailén Kendelman. Unha proposta singular na que a artista convértese nunha muller orquestra accionando varios instrumentos a través dun curioso sistema de mecanismos, cordas e roldanas cos que interpreta con habilidade ritmos galegos, músicas do leste e folclore latinoamericano.

O público que entra no mundo de Unha señora orquestra pasa a formar parte dun espectáculo cheo de humor e tenrura, move o esqueleto con temas bailables e chalados, canta con ela as súas letras reivindicativas e un chisco picantes. Podiamos empezar mellor?