A lúa, válvula de spray

Cando a lúa é unha válvula de spray, a noite pode debuxar as escenas máis inesperadas. As accións da madrugada sucédense entón na stop-motion dos murais urbanos e nada ten volta atrás. Nese carrusel vense envoltos Sara, María e Leo mentres celebran un rito durante o San Xoán. Coa intensidade dun accidente, o que sucede esa noite cambiará por sempre a vida dos tres mozos.

A lúa, válvula de spray é unha ficción sonora na que a escenografía é unha selección da arte urbana que se atopa en Carballo. O FIOT implícase na experimentación escénica cunha iniciativa propia, realizada en coprodución co LIDISS (Laboratorio de Investigación en Innovación Social e Cultural Sostible), que conxuga as artes escénicas co espazo urbano e que explora novos formatos e as posibilidades que ofrecen as ferramentas tecnolóxicas.

Autora: Rosalía Fernández Rial
Dirección teatral: Quico Cadaval
Espazo sonoro: Marcos PTT Carballido
Intérpretes: Melania Cruz, Santi Romay, Maria Roja. Coas voces de Marcos PTT Carballido e Rosalía Fernández Rial
Procedencia: Galicia